អី្វទៅហៅថា API?
Feb 15, 2021 | 09:44 0 views
Internship
នៅក្នុងសម័យកាលនៃការប្រើប្រាស់បច្ចេកវិទ្យាឌីជីថលសម្រាប់ការផ្តល់សេវាសាធារណៈ ឬការបំពេញអាជីវកម្មនៅក្នុងសង្គម ស្ថាប័ននីមួយៗតែងមានតម្រូវការនៃការតភ្ជាប់ទិន្នន័យរវាងប្រព័ន្ធព័ត៌មានវិទ្យារបស់ខ្លួនជាមួយនឹងប្រព័ន្ធព័ត៌មានវិទ្យារបស់ស្ថាប័នដ៏ទៃ។ ការតភ្ជាប់ទិន្នន័យអាចត្រូវបានអនុវត្តរវាងស្ថាប័នរដ្ឋ និងស្ថាប័នរដ្ឋ ស្ថាប័នរដ្ឋ និងឯកជន ឬឯកជន និងឯកជន។ ការតភ្ជាប់ទិន្នន័យរវាងប្រព័ន្ធមួយទៅប្រព័ន្ធតម្រូវអោយមានការរៀបចំ API ជាមុន។
API មកពីពាក្យជាភាសារអង់គ្លេសថា Application Programming Interface ឬពេលខ្លះត្រូវបានសរសេរថា Application Programmable Interface។ ជាសាមញ្ញ API ត្រូវបានអ្នកសរសេរកូដ (Programmer) ស្គាល់ថាជាតំណភ្ជាប់ ឬ Code តភ្ជាប់ ដើម្បីទាញយកទិន្នន័យពីប្រព័ន្ធដ៏ទៃ មកកាន់ប្រព័ន្ធព័ត៌មានវិទ្យា ឬ Application របស់ខ្លួន។ តែបើស្វែងយល់អោយកាន់តែស៊ីជម្រៅ API មានចំណុចជាច្រើន ដែលអ្នកគ្រប់គ្រងផ្នែកព័ត៌មានវិទ្យា (CIO) ត្រូវការស្វែងយល់។
កត្តាអ្វីខ្លះដែលតម្រូវអោយគេប្រើប្រាស់ API?
API គឺរួមបញ្ចូលនូវលក្ខខណ្ឌ និងគោលការណ៍ដែលត្រូវបានកំណត់ឡើងរួមមួយ ប្រើប្រាស់ទៅលើការកសាងតំណរភ្ជាប់ពីប្រព័ន្ធព័ត៌មានវិទ្យារបស់ស្ថាប័នមួយទៅប្រព័ន្ធព័ត៌មានវិទ្យារបស់ស្ថាប័នមួយទៀត ដោយពុំចាំបាច់ប៉ះពាល់ដល់ផ្នែកខាងក្នុងនៃប្រព័ន្ធ។ មិនមែនរាល់ទិន្នន័យទាំងអស់ក្នុងប្រព័ន្ធមួយអាចចែករំលែកទៅកាន់ប្រព័ន្ធដ៏ទៃបានទេ ដោយហេតុថាទិន្នន័យមួយភាគជាទិន្នន័យផ្ទៃក្នុង សម្រាប់ប្រើប្រាស់តែការងារក្នុងស្ថាប័នមួយតែប៉ុណ្ណោះ និងពុំអាចចែករំលែកផ្សព្វផ្សាយទៅក្រៅស្ថាប័ន។ ក្នុងករណីនេះ API ត្រូវបានគេប្រើប្រាស់ដើម្បីកំណត់អំពីលក្ខខណ្ឌ យន្តការតភ្ជាប់ទិន្នន័យ និងទំហំទិន្នន័យដែលអាចចែករំលែកបានតាមការកំណត់ និងឯកភាពជាមុនពីម្ចាស់ស្ថាប័ន។
បន្ថែមពីនេះ API ត្រូវបានគេប្រើប្រាស់ដើម្បីកាត់បន្ថយកម្លាំងពលកម្ម ពេលវេលា ថវិកា លើការបង្កើតប្រព័ន្ធព័ត៌មានវិទ្យា និងការប្រមូលទិន្នន័យ។ ឧទាហរណ៍៖ ប្រព័ន្ធព័ត៌មានវិទ្យាគ្រប់គ្រង់ការបង់ពន្ធ ។ ទន្ទឹមនឹងទិន្នន័យដែលមានក្នុងបណ្ណប៉ាតង់ ប្រព័ន្ធនេះក៏ត្រូវការផ្ទៀងផ្ទាត់ទិន្នន័យអត្តសញ្ញាណរបស់ម្ចាស់អាជីវកម្ម និងព័ត៌មានចុះបញ្ជីពាណិជ្ជកម្មរបស់អាជីវកម្មនីមួយៗដែរ។ ដូច្នេះប្រព័ន្ធនេះ ត្រូវតភ្ជាប់ជាមួយនឹងប្រព័ន្ធអត្តសញ្ញាណកម្មរបស់ប្រជាពលរដ្ឋ ដើម្បីទាញយកព័ត៌មានអត្តសញ្ញាណបណ្ណប្រជាពលរដ្ឋ ហើយត្រូវតភ្ជាប់ទាញយកទិន្នន័យព័ត៌មានអាជីវកម្មចុះបញ្ជីពាណិជ្ជកម្មក្នុងប្រព័ន្ធចុះបញ្ជីពាណិជ្ជកម្មរបស់ក្រសួងពាណិជ្ជកម្ម។ ការតភ្ជាប់បែបនេះបង្ករលក្ខណៈងាយស្រួល ពន្លឿនដំណើរការរបស់ប្រព័ន្ធ និងកាត់បន្ថយចំណាយលើការបង្កើតប្រព័ន្ធថ្មី ដោយហេតុថាពន្ធដារពុំចាំបាច់ទៅបង្កើតប្រព័ន្ធកត់ត្រាអត្តសញ្ញាណរបស់ប្រជាពលរដ្ឋ និងប្រព័ន្ធកត់ត្រាទិន្នន័យអាជីវកម្មចុះបញ្ជីពាណិជ្ជកម្មឡើងវិញទេ ដោយគ្រាន់តែតភ្ជាប់ទៅកាន់ ប្រព័ន្ធអត្តសញ្ញាណកម្មរបស់ប្រជាពលរដ្ឋ ប្រព័ន្ធកត់ត្រាទិន្នន័យអាជីវកម្មចុះបញ្ជីពាណិជ្ជកម្មដែលមានស្រាប់នៅស្ថាប័នដ៏ទៃបានហើយ។
API នៅមានចំណុចច្រើនទៀតដែលថ្នាក់ដឹកនាំស្ថាប័ន ជាពិសេស អ្នកទទួលខុសត្រូវលើកិច្ចការគ្រប់គ្រង IT ត្រូវស្វែងយល់ ហើយចំណុចទាំងនោះរួមមាន ការប្រើប្រាស់ API លើការតភ្ជាប់ ផ្លាស់ប្តូរទិន្នន័យរវាងប្រព័ន្ធព័ត៌មានវិទ្យា ការពារសុវត្ថិភាពព័ត៌មាន និងការបិទបាំងអំពីហេដ្ឋារចនាសម្ព័ន្ធផ្ទៃក្នុងនៃប្រព័ន្ធ។
