អ្វីខ្លះដែលអ្នកត្រូវដឹងមុននឹងរើសជំនាញរៀននៅមហាវិទ្យាល័យ?
Feb 24, 2021 | 17:19 0 views
បន្ទាប់ពីប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប វាក៏ដល់ពេលវេលាដែលអ្នកត្រូវសម្រេចចិត្តជ្រើសរើសជំនាញសម្រាប់រៀនបន្តនៅថ្នាក់មហាវិទ្យាល័យ។ មនុស្សជាច្រើនបានចាត់ទុកថា វាជាការសម្រេចចិត្តដ៏ពិបាកមួយ ហើយអ្នកខ្លះក៏បានសម្រេចរើសជំនាញមួយយ៉ាងប្រថុយប្រថាន ឬរើសតាមការចង់បានរបស់ឪពុកម្ដាយ និងក្រុមគ្រួសារ។
ឆ្លើយតបទៅនឹងបញ្ហានេះ
អ្នកគប្បីសួរខ្លួនឯងនូវសំណួរ 3 ដូចខាងក្រោម
មុននឹងសម្រេចចិត្តរើសជំនាញរៀននៅមហាវិទ្យាល័យ៖
1.
ហេតុអ្វីបានជាអ្នករើសយកជំនាញនេះ?
ការរើសជំនាញសិក្សានៅថ្នាក់មហាវិទ្យាល័យ គួរតែជាមុខវិជ្ជាដែលអ្នកស្រឡាញ់ និងចង់រៀនដោយចិត្តខ្លួនឯង មិនមែនជាការរើសតាមឪពុកម្ដាយ ឬតាមអ្នកដទៃនោះទេ។ ពួកគេអាចជួយផ្ដល់យោបល់ឱ្យអ្នកបាន តែការសម្រេចរបស់អ្នកត្រូវផ្អែកតាមចិត្តរបស់អ្នកផ្ទាល់ ថាអ្នកខ្លួនឯងស្រឡាញ់ជំនាញអ្វី ក៏រើសយកតាមបេះដូងខ្លួនឯងទៅ ព្រោះគ្មានអ្នកណានឹងរៀនជំនួសអ្នកឡើយ។
2.
តើអ្នកបានដឹងអ្វីខ្លះពីជំនាញដែលអ្នករើសនេះ?
បន្ទាប់ពីដឹងថាខ្លួនស្រឡាញ់ជំនាញអ្វីហើយ អ្នកត្រូវសួរខ្លួនឯងថា អ្នកបានដឹងអ្វីខ្លះពីជំនាញដែលអ្នកមានបំណងនឹងរើសនោះ។ តើការសិក្សាជំនាញនោះមានរយៈពេលប៉ុន្មានឆ្នាំ? តើមុខជំនាញនោះនឹងសិក្សាអំពីអ្វីខ្លះ? តើមានសាលាណាខ្លះដែលមានមុខជំនាញនោះ? តើតម្លៃក្នុងការសិក្សាជំនាញនោះមានតម្លៃប៉ុន្មាន? ចេញពីជំនាញនោះ តើអ្នកអាចរៀនអ្វីបន្តបានខ្លះ ឬអាចធ្វើការអ្វីខ្លះបាន?
3.
តើអ្នកចង់ក្លាយជាអ្វីនៅថ្ងៃអនាគត?
គោលដៅនៅថ្ងៃអនាគតរបស់អ្នក ជាកត្តាសំខាន់ណាស់ដល់ការសម្រេចចិត្តរើសយកមុខជំនាញរៀននៅមហាវិទ្យាល័យ។ អ្នកចង់ក្លាយជាអ្វីនៅថ្ងៃមុខ អ្នកត្រូវរើសយកជំនាញតាមនោះដែរ គឺអ្នកត្រូវដឹងថា ជំនាញមួយណាដែលអាចនាំអ្នកទៅដល់គោលដៅរបស់អ្នកបាន។
ការរើសជំនាញរៀននៅមហាវិទ្យាល័យពិតជាមានសារៈសំខាន់ណាស់សម្រាប់អនាគត
អ្នកត្រូវធ្វើការសម្រេចចិត្តឱ្យបានម៉ត់ចត់។ ក្ដីស្រមៃរបស់យើងម្នាក់ៗខុសៗគ្នា
អ្នកគួរតែរើសរៀនជំនាញណាដែលអ្នកស្រឡាញ់ អាចនាំឱ្យអ្នកសម្រេចក្ដីស្រមៃបាន
តែក៏ត្រូវសមស្របនឹងលក្ខខណ្ឌនៃជីវិតរស់នៅរបស់
អ្នកផងដែរ។
ប្រភព៖ Aseanop
