វិធីការពារភ្នែករបស់អ្នកពីអេក្រង់ទូរសព្ទ ឬកុំព្យូទ័រ
Feb 23, 2021 | 11:40 0 views
ស្ថិតក្នុងសម័យបច្ចេកវិទ្យាកំពុងរីកចម្រើនឥតឈប់ឈរ មនុស្សយើងជាច្រើនមានទូរសព្ទដៃ ឬ កុំព្យូទ័រប្រើប្រាស់ដើម្បីសម្រួលដល់តម្រូវការសិក្សា ការងារ ឬការកំសាន្តផ្សេងៗ។ ទន្ទឹមនឹងនេះ យើងក៏សង្កេតឃើញថា ផលប៉ះពាល់ដែលបណ្ដាលមកការសម្លឹងអេក្រង់ទូរសព្ទ ឬអេក្រង់កុំព្យូទ័រទៅលើភ្នែក មានការកើនឡើងគួរឱ្យកត់សម្គាល់។
“Digital Eye Strain” ជាភាសាបច្ចេកទេសពេទ្យដែលសំដៅដល់បញ្ហាភ្នែកដែលបណ្ដាលមកពីការសម្លឹងមើលអេក្រង់ទូរសព្ទ ឬកុំព្យូទ័រយូរពេក។ រោគសញ្ញារបស់វាមានដូចជា ចុករោយគ្រាប់ភ្នែក ក្ដៅភ្នែក ក្រហាយដល់ចេញទឹកភ្នែក ស្រវាំងភ្នែក ឬអាចបណ្ដាលឱ្យឈឺក្បាល ចុករោយក និងស្មាជាដើម។ Digital Eye Strain នេះមិនមែនជាបញ្ហាធ្ងន់ធ្ងរនោះទេ ប៉ុន្តែវានឹងរំខានយើងម្ដងហើយម្ដងទៀត បើយើងមិនមានវិធីការពារភ្នែករបស់យើងបានល្អ។
ខាងក្រោមនេះគឺជាវិធីការពារភ្នែករបស់អ្នកពីអេក្រង់ទូរសព្ទ
ឬកុំព្យូទ័រ កុំឱ្យមានបញ្ហា Digital
Eye Strain៖
1.
បើអ្នកសម្លឹងអេក្រង់
២០នាទីជាប់គ្នា ត្រូវងាកចេញពីអេក្រង់ ហើយសម្លឹងទៅចំណុចមួយផ្សេងដែលស្ថិតនៅចម្ងាយ ២០
Feets ពីអ្នក ក្នុងរយៈពេល
២០វិនាទី ឬអាចលើសពីនេះ ដើម្បីឱ្យភ្នែកមានពេលសម្រាកខ្លះ។
2. ពន្លឺនៅក្នុងបន្ទប់ ឬកន្លែងដែលអ្នកកំពុងស្ថិតនៅ ត្រូវភ្លឺល្មមសមរម្យអាចឱ្យអ្នកមើលអេក្រង់ទូរសព្ទ ឬកុំព្យូទ័របានស្រួលត្រជាក់ភ្នែក។ ពន្លឺភ្លឺពេក មិនមែនជាជម្រើសល្អសម្រាប់សុខភាពភ្នែករបស់អ្នកនៅពេលអ្នកសម្លឹងអេក្រង់នោះទេ។
3. ប្រើអេក្រង់ដែលមាន Resolution ខ្ពស់ អាចជួយឱ្យអ្នកមិនបាច់ប្រឹងក្នុងការសម្លឹងមើលអក្សរ ឬរូបភាពលើអេក្រង់។
4. សម្របសម្រួលពន្លឺក្នុងទូរសព្ទ ឬក្នុងកុំព្យូទ័ររបស់អ្នកដោយដាក់ឱ្យពន្លឺសម្របសម្រួលដោយស្វ័យប្រវត្តិតាមបរិយាកាសខាងក្រៅ ឬអ្នកអាចកំណត់ដោយខ្លួនឯងដោយបន្ថយពន្លឺអេក្រង់ពេលនៅក្នុងផ្ទះ និងដំឡើងពន្លឺពេលស្ថិតនៅបរិយាកាសខាងក្រៅ។ ប្រើ Night Mode ក៏ជាជម្រើសដ៏ល្អមួយសម្រាប់ពេលយប់។
5. កំណត់ទំហំអក្សរនៅក្នុងទូរសព្ទ ឬកុំព្យូទ័រឱ្យសមល្មមនឹងគំហើញនៃភ្នែករបស់អ្នក។
6. កុំដាក់ភ្នែកនៅជិតអេក្រង់ទូរសព្ទ ឬកុំព្យូទ័រពេក។ បើមើលមិនឃើញច្បាស់ ត្រូវដំឡើងទំហំអក្សរវិញទើបជាការប្រសើរ។
7. កុំសម្លឹងមើលអេក្រង់ទូរសព្ទ ឬកុំព្យូទ័ររហូតភ្លេចព្រិចភ្នែក។ ការព្រិចភ្នែកអាចជួយឱ្យភ្នែកមានសំណើម និងកាត់បន្ថយការចុករោយគ្រាប់ភ្នែក។
8. ពាក់វ៉ែនតាការពារការប៉ះពាល់ពីពន្លឺនៃអេក្រង់ទូរសព្ទ ឬកុំព្យូទ័រ។
9. ប្រើថ្នាំបន្តក់ភ្នែកដែលការពារមិនឱ្យភ្នែកស្ងួត។
ប្រភព៖ Kraff Eye Institute, Kraffeye
