OneSala

ការរៀនសូត្រ ឬការធ្វើការក្ដី វាទាមទារឱ្យយើងយកចិត្តទុកដាក់ មានអារម្មណ៍មូលល្អក្នុងការផ្ចង់ស្មារតី ទើបលទ្ធផលបានល្អប្រសើរ។ មានមនុស្សមួយចំនួនបានលើកឡើងនូវក្ដីបារម្ភថា ពួកគេពិបាកផ្ដោតអារម្មណ៍ក្នុងពេលកំពុងរៀន ឬពេលកំពុងធ្វើការណាស់។ អ្វីដែលពួកគេចង់ដឹងនោះគឺ "តើគួរធ្វើយ៉ាងណាទើបអាចផ្ដោតអារម្មណ៍រៀនសូត្រ ឬធ្វើការបានល្អ?"

ឆ្លើយតបនឹងបញ្ហានេះ យើងសូមណែនាំនូវវិធីមួយចំនួនដូចខាងក្រោមដែលអាចជួយអ្នកឱ្យផ្ដោតអារម្មណ៍បានល្អជាងមុន៖

1.   រកកន្លែងស្ងប់ស្ងាត់ គ្មានការរំខាន

ការរៀនសូត្រជាមួយគ្រូក្នុងថ្នាក់ក្ដី ការស្វ័យសិក្សាក្រៅថ្នាក់ដោយខ្លួនឯងក្ដី រមែងត្រូវការបរិយាកាសស្ងប់ស្ងាត់ ទើបយើងអាចឈ្វែងយល់ពីមេរៀនបានងាយ។ បើមានសំឡេងរំខាន ច្បាស់ណាស់ថាយើងនឹងពិបាកផ្ដោតអារម្មណ៍លើការរៀនសូត្រ។ ដូច្នេះហើយ ចូររើសកន្លែងដែលស្ងាត់សម្រាប់ការរៀនសូត្រ។ ចំពោះអ្នកធ្វើការក្នុងការិយាល័យខ្លះ ឬធ្វើការ Freelance ជាអ្នកសរសេរ ឬអ្នកនិពន្ធក្ដី ក៏ត្រូវការភាពស្ងប់ស្ងាត់ដូចគ្នា លើកលែងតែការងារមួយចំនួនដែលត្រូវការប្រាស្រ័យទាក់ទងគ្នាឥតដាច់ ដូចជាការងារសិល្បៈ ឬការថតកុនជាដើម។

2.   ត្រូវបែងចែកពេលវេលាឱ្យច្បាស់លាស់

 អ្នកខ្លះរៀនពីរសាលា ឬអាចរៀនផងធ្វើការផង ឬក៏ធ្វើការច្រើនកន្លែង។ ការទទួលខុសត្រូវច្រើន អាចចោទជាបញ្ហា បើយើងធ្វើការបែងចែកពេលវេលាមិនបានត្រឹមត្រូវ។

 - កំពុងអង្គុយរៀននៅសាលានេះ អារម្មណ៍កំពុងបារម្ភពីរឿង assignment ឬការប្រឡងនៅសាលានោះ ជួនកាលកំពុងរៀននៅសាលានេះសោះ បែរលួចរំលឹកមេរៀននៅសាលាផ្សេងក៏មាន

- ជួនការងារធ្វើមិនទាន់ឱ្យគេ ក៏មិនអាចផ្ដោតអារម្មណ៍រៀនសូត្របាន ហើយជួនជិតប្រឡង ក៏មិនអាចផ្ដោតអារម្មណ៍ធ្វើការឱ្យគេបាន។

- ធ្វើការច្រើនកន្លែង តែ deadline ដំណាលៗគ្នា ធ្វើនេះមិនទាន់ ធ្វើនោះក៏មិនទាន់។

ទាំងអស់នេះសុទ្ធតែជាមូលហេតុដែលអាចធ្វើឱ្យយើងមិនអាចផ្ដោតអារម្មណ៍បានល្អក្នុងការរៀន ឬការងារ។ គន្លឹះមួយសម្រាប់អ្នកដែលរវល់ពីរបីកន្លែងបែបនេះ គឺត្រូវរៀនបែងចែកពេលវេលាឱ្យបានច្បាស់លាស់សម្រាប់កន្លែងនីមួយៗ ឱ្យសមាមាត្រទៅនឹងទំហំនៃទំនួលខុសត្រូវទាំងកិច្ចការរៀនសូត្រ និងការងារ។

3.   កុំរំខានខ្លួនឯង

      បច្ចេកវិទ្យារីកចម្រើន ផ្ដល់ភាពងាយស្រួលដល់ទំនាក់ទំនងរបស់មនុស្សមិនថាយើងស្ថិតនៅឆ្ងាយពីគ្នាយ៉ាងណា។ ប៉ុន្តែការប្រើប្រាស់ទូរសព្ទដៃ បណ្ដាញសង្គម ឬការកំសាន្តតាមអនឡាញនានាដោយមិនមានដែនកំណត់ ប្រើប្រាស់វាក្នុងម៉ោងរៀនសូត្រ ឬក្នុងម៉ោងធ្វើការដោយមិនចាំបាច់នោះ ក៏អាចកាត់បន្ថយការផ្ដោតអារម្មណ៍របស់អ្នកផងដែរ។ ដូច្នេះអ្នកមិនគួរប្រើប្រាស់ Facebook, Instagram, Telegram ឬ Chat ក្នុងម៉ោងរៀន ឬម៉ោងធ្វើការឡើយ បើមិនមានមូលហេតុចាំបាច់។

      អ្នកខ្លះចូលចិត្តស្ដាប់ចម្រៀងពេលស្វ័យសិក្សា ឬធ្វើការតែម្នាក់ឯង។ ចូរកត់សម្គាល់ដោយខ្លួនឯងថា ការស្ដាប់ចម្រៀងបណ្ដើរ រៀនឬធ្វើការបណ្ដើរ អ្នកអាចផ្ដោតអារម្មណ៍បានល្អដែរទេ? បើការស្ដាប់ចម្រៀង មិនចោទជាបញ្ហារំខានដល់អ្នកទេ អ្នកអាចបន្តធ្វើបាន ព្រោះវាអាស្រ័យនឹងចំណង់ចំណូលចិត្តរបស់មនុស្សម្នាក់ៗ។ អ្នកត្រូវច្បាស់ថា អ្នកមិនធ្វើអ្វីដែលរំខានដល់ការផ្ចង់អារម្មណ៍របស់អ្នកក្នុងពេលរៀន ឬពេលធ្វើការ។

4.   ញ៉ាំឆ្អែត &គេងគ្រប់គ្រាន់

ការបានបរិភោគអាហារឆ្អែត ក៏ជាចំណែកមួយជួយឱ្យយើងអាចផ្ដោតអារម្មណ៍លើការរៀនសូត្រ និងការធ្វើការបានល្អផងដែរ។ នៅពេលយើងឃ្លាន ការផ្ចង់អារម្មណ៍នឹងត្រូវថយចុះ ព្រោះខួរក្បាលរបស់យើងនឹងផ្ដោតលើភាពឃ្លានជំនួស។ ហេតុនេះមុនពេលរៀន ឬពេលធ្វើការ ត្រូវញ៉ាំអាហារឱ្យបានឆ្អែតសិន តែមិនមែនឆ្អែតពេកដល់ថ្នាក់ងងុយគេងនោះឡើយ។

ការគេងបានគ្រប់គ្រាន់ ក៏ជាកត្តាសំខាន់ដែលជួយដល់ការផ្ដោតអារម្មណ៍របស់យើងដូចគ្នា។ បើយើងគេងមិនបានគ្រប់គ្រាន់ យើងនឹងងងុយក្នុងម៉ោងរៀន ឬក្នុងពេលធ្វើការ។ ការងងុយគេង មិនអាចឱ្យយើងបង្ខំចិត្តផ្ចង់អារម្មណ៍បានឡើយ។ អ្នកខ្លះជ្រើសយកការញ៉ាំកាហ្វេ ជាជំនួយដល់ការងងុយគេងប៉ុន្តែសម្រាប់អ្នកមិនចេះញ៉ាំកាហ្វេ មានតែការគេងឱ្យបានគ្រប់គ្រាន់ប៉ុណ្ណោះទើបជាការប្រសើរ។

បើអ្នកបានអនុវត្តនូវវិធីខាងលើនេះរួចរាល់ហើយ នៅតែមិនមានប្រសិទ្ធភាពទៀត វាប្រហែលដល់ពេលដែលអ្នកត្រូវសួរខ្លួនឯងឡើងវិញថា "អ្នកស្រឡាញ់មុខវិជ្ជាដែលអ្នកកំពុងរៀន ឬការងារដែលអ្នកកំពុងធ្វើនេះដែរទេ?" ជួនកាលបញ្ហាមិនមែនមកពីការមិនអាចផ្ដោតអារម្មណ៍លើវាឡើយ តែអាចមកពីអ្នកមិនបានស្រឡាញ់ជំនាញដែលអ្នករៀន ឬការងារដែលអ្នកធ្វើ ទើបបណ្ដាលឱ្យអ្នកគ្មានទឹកចិត្តក្នុង     ការខំរៀន ឬការធ្វើការងារនោះ៕ 

ប្រភព៖ Mr. Ratha/OneSala